Jepet premiera e filmit të shumëpritur “Hapësira mes nesh”Aktorët e dramës romantike “science-fiction”, “Hapësira mes nesh” u mblodhën në Los Angeles për premierën e filmit të pritur me shumë interes.

Asa Butterfield interpreton Gardner Elliot, i pari njeri i lindur në Mars, i cili ndeshet gjatë udhëtimit drejt Tokës me një sërë të papriturash. Kësaj aventure, Gardner i hyn bashkë me një vajzë tepër të zgjuar, të cilën e ka njohur “online”. Roli i Tulsës iu besua aktores Britt Robertson, transmeton TCH.

“Gardner ka jetuar në Mars për 16 vite dhe i gjithë filmi tregon marrëdhëniet që ai zhvillon me njerëzit, aventurën që ndërmer. Është një përzierje gjërash, nuk kemi të bëjmë me një zhaner specifik”, tha Britt Robertson, aktore.

Butterfieldit i është dashur të punojë shumë me të ecurën e tij, sepse duhet të hynte në botën e një adoleshenti që nuk i njeh pasojat e forcës së gravitetit.

“Kam kaluar nuk e di sa kohë duke parë marshimet e pinguinëve. Nuk po tallem, unë isha ‘Këmbët e lumtura’. Ashtu isha vërtet. Ndonjëherë vija vërdallë me pesha në kyçet e këmbëve, e pastaj i hiqja që të ndieja ndryshimin”, tha Asa Butterfield, aktor.

Filmi vjen me regji të Peter Chelsom, i cili arriti ta bindte Gary Oldmanin të bëhej pjesë e kastit të aktorëve e të vihej në një rol kryesor të frymëzuar nga manjatët Richard Branson e Elon Musk. “Hapësira mes nesh” do të shfaqet në kinematë amerikane nga data 3 shkurt.

PËRGJIGJU

Please enter your comment!
Please enter your name here