Kaseta e Dasmës” do të jetë në konkurrencë ndërkombëtare në Regensburg Short Film Festival, Landshuter Short Film Festival dhe Friburg Film Festival.

Filmi është një tregim për një mashkull, që është gati për të ikur nga Kosova në Gjermani nëpërmjet një dasme të falsifikuar, mirëpo në fund vendos të ndalet.

Filmi devijon nga portretizimi i zakonshëm të martesës së aranzhuar, duke e shndërruar atë në një arsyeje për të dashur vendlindjen, kulturën dhe popullin.

Filmi është xhiruar në janar të vitit 2011, me ekipe filmike nga Kosova, Gjermania dhe Shqipëria, me aktorët kryesor Astrit Kabashi, Yllka Gashi, Fatmir Spahiu, Çun Lajçi etj.

“Kaseta e Dasmës”, me regji dhe skenar të Ariel Shaban, e përkrahur nga Qendra Kinematografike e Kosovës në vitin 2010, me produksion të Qendra Production nga Kosova dhe Detail Film nga Gjermania. Filmi ka pasur mbështetje gjithashtu edhe nga Fondacioni Kosovar për Shoqëri Civile (KCSF). /Koha/

Përfaqësuesja e Shqipërisë në garën e sivjetme të 57 për Këngën e Eurovisionit, Rona Nishliu do të paraqitet në gjysmëfinalen e parë, më 22 maj, u vendos me shortin e hedhur sot në kryeqytetin e Azerbajxhanit.

Krahas Ronës, më 22 janar do të paraqiten edhe përfaqësuesit e Malit të Zi, Islandës, Rumanisë, Belgjikës, Letonisë, Zvicrës, Finlandës, Greqisë, Moldavisë, Qipros, Danimarkës, Austrisë, Rusisë, San Marinos, Irlandës dhe Hungarisë.

Nata e dytë gjysmëfinale, ndërkaq do të mbahet më 24 maj, kurse finalja e madhe më 26 maj.

Drama psikologjike “Melancholia” është shpallur filmi më i mirë i vitit nga Shoqata Kombëtare e Kritikëve të Filmit (National Society Film Critics).

Ylli i këtij filmi, Kirsten Dunst, është shpallur aktorja më e mirë, derisa çmimi për aktorin më të mirë i ka takuar Brad Pittit me rolet në dramat “Moneyball” dhe “The Tree of Life”.

Por fitorja më e madhe për “Melancholian” është se filmi ka rritur shanset për të pretenduar çmimin “Oscar”. Academy Awards do të publikojë të nominuarit në fund të këtij muaji. “Lars von Trier” u mposht në garën për çmimin e regjisë më të mirë për “Melancholian” nga regjisori Terrence Malik, i cili e fitoi këtë çmim me “Tree of Life”. Ky film u shpërblye edhe me çmimin për kinematografi.

I shtrirë në një vend që ka sfond të errët sa u përket martesave, filmi “Melancholia” eksploron marrëdhëniet e dy motrave. Protagonistja që luhet nga Dunst është nuse, në kohën kur një planet i çuditshëm rrezikon të përplaset me tokën, për të fshirë të gjitha gjurmët e ekzistencës njerëzore. Pitt, i cili tashmë ka forcuar statusin e pretendentit për çmimin “Oscar” është nderuar për rolin e menaxherit Billy Beane në “Moneyball”, sikurse edhe me babanë rigoroz në “The Tree of Life”.

Çmimet e kritikëve të filmit janë të rëndësishme, sepse ndihmojnë në ndërtimin e pasqyrimeve për të ecur drejt garës prestigjioze të filmit, Academy Awards. “National Society Film Critics” përfshin 58 anëtarë që janë përfaqësues të gazetave të përditshme në Los Angeles, Boston, New York, Chicago dhe në qytete të tjera. Ndër to janë “Time”, “Newsweek”, “The New Yorker”. Çmimi për performancën më të mirë në rol dytësor i ka takuar Albert Brooksit, për rolin në dramën “Drive” dhe Jessica Chasrain, e cila është nderuar për performancat në “The Tree of Life”, “Talk Shelter” dhe “The Help”.

Shumë filma të cilët kanë marrë kritika pozitive, duke përfshirë “The Artiste”, “The Descendants”, dhe “Hugo” e Martin Scorseses janë lënë jashtë listës së fituesve, megjithëse Scorsese ka qenë shumë afër me vota që të fitojë çmimin për regjisorin më të mirë. Çmimi për filmin më të mirë në gjuhë të huaj, i ka takuar filmit iranian “A Separation”, që ka një rrëfim për një çift që përballet me vendimin për të braktisur vendin e lindjes.

Ky film po ashtu ka fituar çmimin për skenarin më të mirë. Kritikët e filmit e kanë emëruar filmin më të mirë jofitkiv, dokumentarin “The Cave of Forgotten Dreams”, i realizuar në teknikën 3D nga Werner Herzog. Ken Jacobs fitoi çmimin për film eksperimental me “Seeking the Monkey King”.

Edicioni i 50-të i Festivalit të Këngës në RTSH startoi mbrëmë me natën e parë të tij. Janë 28 këngë që do të konkurrojnë për çmimin e parë të festivalit e më pas për të përfaqësuar Shqipërinë në Festivalin Europian.

Gjatë natës së parë u ngjitën në skenë 14 këngët e para, prej të cilave 10 do të shkojnë në finalen e 29 dhjetorit. Ata janë Gerta Mahmutaj, Bashkim Alibali, Samanta Karavello, Endri dhe Stefi Prifti, Rona Nishliu, Rudina Delia, Marjeta Billo, Hercina Matmuja, Altin Goci, Elton Deda.

Këngët përzgjidhen nga një juri e përbërë nga 7 personalitete të fushës së muzikës, por jo vetëm. Juria e këtij viti përbëhet nga Zhani Ciko, Zana Shuteriqi, Edmond Xhani, Aldo Shllaku, Ndriçim Xhepa, Redon Makashi dhe Robert Rakipllari.

Në natën finale votimi i tyre do të jetë i drejtpërdrejtë, çka ua shton më tepër përgjegjësinë për zgjedhjet e tyre.

Këtë vit drejtimin e festivalit e ka marrë në dorë Martin Leka, regjinë Osman Mula, skenarin Pandi Laço e Edlira Birko, ndërsa prezantimin Hygerta Sako, Kreshnik Xhelilaj dhe Enkelejda Zeko.

Gjatë netëve nuk do të mungojnë edhe të ftuarit e huaj, me të cilët do të ndahet gëzimi i një jubileu. Përveç që ky edicion përkon me 50-vjetorin e Festivalit të RTSH-së, çka do të thotë një udhëtim i gjatë në rrugën e këngës, ai do të mbahet mend edhe për kthimin në traditën e dikurshme, atë të interpretimit live, por kuptohet me një teknologji shumë më të avancuar se dikur.

Orkestrës së RTSH-së, e cila ka qenë gjithnjë live, i është shtuar edhe një bandë muzikore, nën drejtimin e Shpëtim Saraçit, që këtë vit është edhe drejtori artistik i festivalit.

Që nga këngëtari, tek baza orkestrale, tek harqet gjithçka do të zhvillohet drejtpërdrejt nga skena e Pallatit të Kongreseve dhe në ekranin e RTSH-së.

Si nje edicion jubilar, Festivali i Kengës në Radiotelevizionin Shqiptar do të mbahet këtë vit në 4 netë, 26, 27, 28 dhe 29 Dhjetor. Nata e parë dhe e dytë janë neta konkurrimi të 28 këngëve pretendente, ndërkohe qe nata e trete do te jete nje retrospektive me këngët më të mira të 50 edicioneve që do të rivijnë në skenen e tij.

Data 29 dhjetor do të shënojë finalen e madhe ku më të mirët e ketij edicioni do të sfidojnë njeri- tjetrin për çmimin e madh, i cili automatikisht ju jep të drejtën e pjesëmarrjes ne Festivalin e Eurosong, që do të zhvillohet në Azerbajxhan.

Pas shfaqes së premierave, të shtatë regjizorët e rinj të festivalit të teatrove për të rinjtë do të përballen me gjykimin e jurisë, në rivënie e pjesëve teatrore në skenë, nga data 22 deri në 28.

Pjesët teatrore janë “Kaligula” me regji të Esmeralda Stafës, “Parrugëdalje” nga Erlis Mataj, “Koleksion i qeltë” i cili vjen me regji të Lorin Terezit, “Vdekja dhe Virgjëresha” Klinton Hoxha, “Shoë Time”, Armela Demaj, “Oh ato ditë të lumtura” Redian Mulla dhe Kënaqësitë e Tradhëtisë” nga regjizorja Najada Elmazi.

Në këtë edicion fituesit do të mund të ngushëllohen vetëm me certifikata pasi për ata nuk do të ketë çmime në formë monetare, ndryshe nga vite e shkuara.

Edicioni i shtatë i festivalit të teatrove për të rinj, është një projekt për të rinj i cili financohet nga Ministria e Turizmit Kulturës Rinisë dhe Sporteve. Premierat e pjesëve teatrore janë dhënë në sallën e vogël të Teatrit Kombëtar si dhe në Teatrin Metropol.

Rrëfimi për një punk grup në Maqedoni ka fituar edicionin e nëntë të Festivalit Ndërkombëtar të Filmit në Tiranë. “Punk’s Not Dad”, me regji të Vladimir Blagjevksit ka marrë çmimin “Filmi më i mirë në TIFF”.

Filmi gjithashtu mori çmimin si më i miri gjykuar nga mediet. “Punk’s not dead” në shtator të këtij viti mori çmimin special të jurisë në edicionin e tretë të festivalit ndërkombëtar të filmit në Prishtinë “PriFilmFest”.

Në ceremoninë e ndarjes së çmimeve të Festivalit në Tiranë janë dhënë edhe çmime të tjera. Por asnjëri nga katër filmat, sa ishin nga Kosova, nuk është shpërblyer.

Regjisorja më e mirë është shpallur Beryl Koltz me filmin “Hot Hot Hot”, ndërsa aktori në rolin kryesor në këtë film Rob Stanley mori çmimin e aktorit më të mirë. Çmimi për aktoren më të mirë i ka takuar Monica Birledeanu për rolin e saj në filmin “Maternity Blues”. Filmi më i mirë i shkurtër u zgjodh filmi nga Iraku  “The sound of rain” me regji të Jalal Saedpanah.

“Tale of the wind” një animacion prodhim portugez me regji të Claudia Jordao ka marrë çmimin për filmin më të mirë animacion, ndërsa filmi më i mirë eksperimental është shpallur “Paper memories” nën regjinë e spanjollit Theo Putzu.

Këtë vit në Festivalin Ndërkombëtar të Filmit në Tiranë gjatë pesë ditëve janë shfaqur rreth 100 filma, nga 60 shtete. Filmat këtë vit janë cilësuar për laramani të tyre, pasi që kanë qenë të kategorive; si animacion, dokumentarë, eksperimentalë, filma me metrazh të shkurtër dhe të gjatë.

Njëzet rrëfime të cilat për emërues të përbashkët kanë të drejtat e njeriut, do të pasqyrohen në ekranin e madh të kinemasë së vetme në kryeqytet.

Shtatëmbëdhjetë dokumentarë të autorëve ndërkombëtarë dhe tre të atyre vendorë përbëjnë mozaikun e Festivalit Ndërkombëtar të Filmit Dokumentar për të Drejtat e Njeriut “Një botë”. Edicioni i njëmbëdhjetë i këtij festivali nis rrugëtimin sot (e hënë). “Një botë” organizohet nga Këshilli për Mbrojtjen e të Drejtave e Lirive të Njeriut.

Arian Zeka, drejtor i edicionit të sivjetmë të festivalit, ka thënë se autorët e dokumentarëve që do të garojnë për çmimet e “Një botë”, vijnë nga katër anët e botës.

“Autorët në konkurrencën zyrtare të edicionit të njëmbëdhjetë të festivalit janë nga Meksika, Çekia, Kanadaja, Mbretëria e Bashkuar, Suedia, Izraeli, Italia, Zimbabveja, Spanja, Belgjika, Shtetet e Bashkuara, Gjermania, India dhe tre autorë vendorë”, ka thënë Zeka.

Derisa ka thënë se vitin e kaluar festivali nuk është realizuar për shkak se nuk ka arritur të sigurojë mbështetje për organizim, Zeka ka theksuar qëllimin e “Një botë”.

“Vazhdon të jetë i njëjtë promovimi i të drejtave të njeriut, rritja e vetëdijes së njerëzve për respektimin e të drejtave e të lirive të njeriut përmes shfaqjes së filmave të cilët trajtojnë shkeljet drastike të të drejtave anembanë botës”, ka thënë ai.

“E veçanta e edicionit të këtij viti është se filmat do të shfaqen edhe në Komunën e Graçanicës”.

Të gjithë filmat do të garojnë për “Çmimin e jurisë” dhe “Çmimin e organizatorit”.

Zeka ka thënë se roli i këtij festivali në promovimin e të drejtave të njeriut prej vitesh është rritur edhe më shumë.

“Duke pasur parasysh që Festivali është ndër vetmit që trajton aspektin e të drejtave të njeriut, atëherë roli i tij ka qenë jashtëzakonisht i madh. Kosova nuk bën pjesë sot në grupin e shteteve ku të drejtat e njeriut shkelen në mënyrë drastike, edhe pse ende mbetet shumë punë për t’u bërë në promovimin e mëtejmë të të drejtave e lirive të plota në përputhje me konventat dhe standardet ndërkombëtare”, ka thënë ai.

Ka përfunduar finalja e madhe e “Këngës Magjike 2011”. Redon Makashi & Arb me këngën “Më lër te fle” kanë fituar çmimin kryesor të edicionit të sivjetmë të këtij festivali. Pirro Çako dhe Vedat Ademi kanë zënë vendin e dytë, ndërsa Besa Kokëdhima u rendit e treta.

Më poshtë ju sjellim listën e plotë të fituesve:

• Kontributi në Kënga Magjike 2011: Alberie Hadërgjonaj – Vetëm ty
• Best Performanc: Rezarta Shkurta – Te jesh e mirë s’mjafton
• Best Balad: Devis Xherahu -Akoma s’e besoj
• Best Ft: Ronela Hajati & Visari – Neles
• Çmimi Televiziv: Era Rusi – Një Lamtumirë
• Çmimi Diskografik: Rozana Radi dhe Mc Kresha – Jabadabadu
• Magjia e parë: Adelina Tahiri- Mos u kthe
• Çmimi i Internetit: Noizy – Shooting Star
• Çmimi Best Dance: Ermal Mamaqi – Vetëm beso
• Çmimi: Best Hip Hop Big Basta & Angelo- Si Melodi
• Çmimi Çesk Zadeja: Jonida Maliqi -Thesar pa emër
• Çmimi i Interpretimit: Greta Koci- Pyes veten
• Kënga Hit: Dr. Flori -S’ma ndjen
• Çmimi i Kritikës: Besa Kokdhima – Botën do ndryshoja
• Çmimi Best Lyrics: Rosela Gjylbegu – Sikur të isha ti
• Çmimi Best Vokal: Kejsi Tola – Më jeto
• Çmimi Kantautori: Redon Makashi & Arb – Më lër të fle
• Çmimi i Pruduksionit: Leonora Jakupi – Këngë e pa kënduar
• Çmimi AMC: Olta Boka – Anna
• Çmimi Tendencë: Eranda Libohova & Aldo – Pa Problem
• Çmimi Kënga Stil: Pirro Çako & Vedat – Bujë vetëm bujë.

Gjysmë finalja e parë e “Këngës Magjike 2011″ do të mbahet sonte në orët e mbrëmjes dhe spektakli do të transmetohet ‘live’ në TV Klan.

Emrat që do të ngjiten në skenë sonte (17 nëntor), në natën e parë gjysmëfinale janë:
1. Albërije Hadërgjonaj
2. Aurela Amzai
3. Barbana
4. Blerina Matraku
5. Bon Bon Band
6. Cyber Band
7. Denisa Gjezo
8. Devis Xherahu
9. Era Rusi
10. Ermal Mamaqi
11. Ester Hoxha
12. Ilir Kazaferi
13. Kejsi Tola
14. Klevis Saliaj
15. Kujtim Prodani
16. Leonora Jakupi
17. Leotrim Gashi
18. Lynex
19. Malda Susuri
20. Noizy
21. Olta Boka
22. Pirro Çako & Vedat Ademi
23. Rrezarta Shkurta
24. Visari & Ronela Hajati. /G.S./Telegrafi/

Gjashtë filma që janë bashkëfinancuar nga buxheti i shtetit janë shfaqur para një komisioni të njërit prej festivaleve më prestigjioze të filmit në Evropë, Berlinale.

“Agnus Dei” i Agim Sopit, “Kodi i jetës” i Ekrem Kryeziut, “Heroi” i Luan Kryeziut, janë tre filmat e gjatë që u janë prezantuar selektorëve të festivalit në Tiranë, ani pse realizimi i tyre ende nuk ka marrë fund. Në takimin vjetor të paraselektimit të filmave nga Evropa Juglindore për festivalin e njohur janë prezantuar edhe tre filma të shkurtër.

Në këtë listë hyjnë “Kaseta e dasmës” i Ariel Shaban, “Kolonat” i Ujkan Hysajt dhe “Shkurta” i Arzana Krajës.

Fatos Berisha, drejtor i Qendrës Kinematografike të Kosovës, ka thënë se filmat mund t’u prezantohen selektorëve edhe kur janë në fazën postproduksionit.

“Në këtë fazë që janë filmat mund të gjykohen nga juria e paraselektimit”, ka thënë Berisha nëpërmjet telefonit nga Tirana.

Ai ka thënë se juria është ende në proces dhe vendimi do të bëhet publik shumë shpejt.

“Shpresoj. Kisha pasur shumë dëshirë që së paku njëri prej tyre të shkonte”, ka thënë Berisha./koha/